Այս կայքը օգտագործում է թխուկներ տվյալների պահպանման համար: Շարունակելով օգտվել կայքից՝ դուք համաձայնում եք այդ ֆայլերի օգտագործմանը:
Գիտե՞ք արդյոք, թե ինչպես պահպանել Ձեր կերակուրների վառ գույնը
21.01.2011
Տարբեր քիմիական և ֆիզիկական երևույթներ կարող են տեղի ունենալ բանջարեղենները մշակելիս: Բանջարեղենների գույները կարող են տարբեր կերպ արձագանքել ջերմաստիճանային փոփոխություններին: Որպեսզի իմանանք, թե ինչպես անել, որ բանջարեղենները այդ փոփոխություններին չենթարկվեն և մատուցելիս իրենց գրավչությունը չկորցնեն, մեզ պետք է իմանալ, թե ինչ փոխազդեցություններ են տեղի ունենում դրանցում:
Սպիտակ բանջարեղեն
Կարտոֆիլը, ծաղկակաղամբը, սոխը, սպիտակ կաղամբը,նեխուրը և ցուկկինին պարունակում են ֆլավանոիդային խմբի գունանյութեր: Թթվային միջավայրում դրանք մնում են սպիտակ, բայց հիմնային միջավայրում դեղնում են: Այդ պատճառով, բանջարեղենների դեղնելուց խուսափելու համար եռացող ջրին ավելացրեք մի քիչ կիտրոնի հյութ: Կարելի է նաև կաթսան ծածկել կափարիչով: Հիշեք նաև, որ սպիտակ բանջարեղենները պետք չէ չափից շատ եփել, քանի որ դրանք կարող են գորշ գույն ստանալ:
Կարմիր բանջարեղեն
Ճակնդեղը, կարմիր կաղամբը և կարմիր սոխը պարունակում են անտոցիանին: Կարմիր գույնը զգայուն է և՛ թթվային, և՛ հիմնային միջավայրի նկատմամբ: Այդ պատճառով, ավելի լավ է եփել ճակնդեղը մի փոքր թթու հյութով, օրինակ՝ ավելացնելով կիտրոն կամ կտրտած խնձոր: Բայց պետք է հիշել, որ անհրաժեշտ է շատ քիչ թթու ավելացնել, քանի որ այն նաև երկարացնում է եփելու տևողությունը: Մնացած թթուն պետք է ավելացնել եփելուց հետո: Եփեք բանջարեղեններն արագ, շատ քիչ ջրով: Եթե հնարավոր է՝ կեղևը մի հանեք, օրինակ՝ ճակնդեղի դեպքում: Լավ խոհարարական մեթոդ է նաև դրանք շոգեխաշելը:
Կանաչ բանջարեղեն
Բրոկկոլին, սպանախը, թրթնջուկը և բրյուսելյան կաղամբը, իրենց գույնը ստանում են քլորոֆիլից: Այն տարրալուծվում է լույսի և բարձր ջերմաստիճանի ազդեցությամբ, չնայած ջրում չի լուծվում:
Երկարատև եփելը նույնպես գունազրկում է այս բանջարեղենները: Հյութեղ կանաչ գույնը պահպանելու համար բանջարեղենները կափարիչով մի ծածկեք, որպեսզի դրանցում պարունակովող բնական թթուները հնարավորություն ունենան գոլորշիանալու: Կանաչ բանջարեղենները եփելու ամենաարդյունավետ եղանակը դրանք շոգեխաշելն է:
Նարնջագույն բանջարեղեն
Գազարը, եգիպտացորենը, լոլիկը, պղպեղը և դդումը պարունակում են կարոտինոիդներ: Այս գույները շատ կայուն են. դրանց պարունակած թթուները և հիմքերը իրենց վրա շատ փոքր չափով են ազդում: Ինչևէ, երկարատև եփելը կարող է բերել դրանց գունազրկման: