Կրճատեք խմորեղենի և քաղցրավենիքի քանակը
Խմորեղենը և քաղցրավենիքն օրգանիզմի համար ածխաջրերի աղբյուր են, որոնք անմիջապես վերածվում են ճարպի: Երբ դուք կրճատում եք խմորեղենի և քաղցրավենիքի քանակը, անմիջապես փոխվում է ձեր օրգանիզմի նյութափոխանակությունը: Ընդ որում, շոկոլադե սալիկից էներգիա ստանալու փոխարեն դուք այն ստանում եք ձեր մեջ կուտակված ճարպերի հաշվին: Արդյու՞նքը: Այս դիետայի առավելությունն այն է, որ դուք քաղցած չեք մնում, սակայն կորցնում եք ավելորդ կիլոգրամներ: Ինչպե՞ս: Պարզապես ընդունելով ավելի շատ սպիտակուցներ:
Հիշեք. Այս դիետան արդյունավետ է միայն այն դեպքում, երբ դառնում է կենսակերպ: Դուք ստիպված չեք լինի հրաժարվել ածխաջրերի հիմնական աղբյուրներից. հացից և մակարոնեղենից: Բավական է միայն դրանց քանակը սահմանափակել: Երբ Դուք հասնեք Ձեր երազանքների կազմվածքին, կարող եք աստիճանաբար սկսել ընդունել ածխաջրեր` փոքր չափաբաժիններով: Եթե նորից սկսեք ամեն օր քաղցրավենիք ուտել, կվերադառնաք Ձեր սկզբնական քաշին:
Դուք կլինեք ավելի առողջ և գեղեցիկ
Ձեր արյան մեջ խոլեստերինի պարունակությունը կիջնի: Դուք նաև կունենաք ավելի ցածր արյան ճնշում: Երեք ամիսն այս դիետայի ամենաճիշտ տևողությունն է: Այս ժամանակահատվածում դուք արագորեն և երկար ժամանակով կկորցնեք ձեր քաշը: Հավասարակշռված դիետան հնարավորություն է տալիս Ձեզ մնալ երիտասարդ: Մարդու մարմինը հիմնականում կազմված է սպիտակուցներից: Ընդգրկելով սննդի մեջ սպիտակուցներ՝ օրգանիզմը ապահովվում է ամինաթթուներով. դրանք նման են աղյուսների, որոնք կազմում են մեր հյուսվածքները: Ձեր բջիջները կվերականգնվեն, և Դուք ավելի երիտասարդ ու ավելի գեղեցիկ տեսք կունենաք: Դուք կմոռանաք մաշկի, մազերի և եղունգների խնդիրների, աչքերի տակի մուգ շրջանների կամ մաշկի գորշ երանգի մասին. Ձեր մաշկը կդառնա շողացող:
Ինչ կարող եք ուտել և որքան
- Միս և կաթնամթերք – Պետք է ընտրել անյուղ միս, նախընտրելի է` հավի կամ հնդկահավի միս, քիչ յուղոտ պանիր և աղի կամ քաղցրահամ ջրերի ձկնեղեն:
- Ջուր – Անհրաժեշտ է խմել օրական առնվազն 2 լիտր ջուր: Ջուրը մարմինը մաքրում է տոքսիններից և նյութափոխանակության արգասիքներից:
- Հաց, խմորեղեն –Այս դիետան կտրուկ սահմանափակում է ածխաջրերի ընդունումը նշված սննդամթերքներից, քանի որ դրանցում կուտակված են ճարպեր, ինչը համարժեք է լրացուցիչ կիլոգրամների:
- Օգտակար ճարպեր – Մեզ համար լավագույն ճարպերը չհագեցած ճարպերն են, որոնք հիմնականում ստացվում են բույսերից և ձկնեղենից: Այս դիետայի դեպքում բարենպաստ են համարվում ընկույզի տարբեր տեսակները և նուշը:
- Բանջարեղեն և մրգեր – Պահանջվում են մեծ քանակությամբ: Մեր օրգանիզմը սրանցից պետք է ստանա ածխաջրեր. դրանք ավելի օգտակար են, քան խմորեղենում կամ հացում պարունակվող ածխաջրերը:
Առողջ զգալու այլ պատճառներ
Ավելորդ քաշից ազատվելու և ավելի գեղեցիկ տեսք ունենալու համար բավական չէ սննդակարգը փոխելը: Դուք պետք է ավելի շատ մարզվեք: Միայն այս կերպ Դուք կսանձեք Ձեր քաշի ավելացման համար պատասխանատու հորմոնները: Կանոնավոր մարմնամարզությունը մեծ ազդեցություն կունենա օրգանիզմի նյութափոխանակության վրա և կօգնի Ձեզ ունենալ նրբագեղ կառուցվածք: Դուք կարող եք ընտրել արագ քայլք, լող, վազք, հեծանվային սպորտ:
Ճաշացանկի օրինակ
Նախաճաշ. Աշորայի հացով տոստ, 2 շերտ խոզապուխտ, մեկ շերտ ցածր յուղայնությամբ պանիր, 1 բաժակ յոգուրտ:
Ընդմիջում. 1 խնձոր:
Ճաշ. սաղմոն` տապակած ոչ կպչուն թավայում և առանց ձեթի, սմբուկ` տապակած 1 թեյի գդալ ձեթում, 2 չորացված աշորայի հացի կտորներ, մեկ գավաթ մրգային աղցան` պատրաստված սեզոնային մրգերից (կամ սառեցված մրգերից):
Թեյ. 1 բաժակ ցածր յուղայնությամբ յոգուրտ:
Ընթրիք. ձուկ (ձողաձուկ, խեկ, իշխան) տապակած ոչ կպչուն թավայում և առանց ձեթի, շոգեխաշած սպանախ, մի քանի կաթնուկի տերև մեկ թեյի գդալ ձիթապտղի ձեթով, 2 չորացված հացի կտոր:
